ಕನ್ನಡ ಪದಬಂಧ

ಪತ್ರಿಕೆಗಳಲ್ಲಿ ಬರುವ ಪದಬಂಧ ನೋಡದವರಾರು? ಕೆಲವು ಮನೆಗಳಲ್ಲಂತೂ ಪದಬಂಧ ಬಿಡಿಸುವ ವಿಷಯದಲ್ಲಿ ನಾನು ತಾನು ಎಂದು ಜಗಳಗಳೇ ನಡೆಯುತ್ತದೆ. ಪತ್ರಿಕೆಯಲ್ಲಿ ಪದಬಂಧ ಬಿಡಿಸಬೇಕಾದರೆ ಪೆನ್ಸಿಲ್ ತೆಗೆದುಕೊಂಡು ಬರೆಯಬೇಕು, ಬರೆದುದನ್ನು ಅಳಿಸಿ ಬರೆಯಬೇಕು, ಹೀಗೆ ನಡೆಯುತ್ತದೆ. ಯಾವುದಾದರೊಂದು ಚೌಕದಲ್ಲಿ ತುಂಬಿಸಬೇಕಾದ ಅಕ್ಷರ ಏನು ಇರಬಹುದು ಎಂಬ ಸುಳುಹು ನೀಡಲು ಅಸಾಧ್ಯ. ಆದರೆ ಗಣಕ ಅಥವಾ ಅಂತರಜಾಲ ಮೂಲಕ ಪದಬಂಧ ಮಾಡಿದರೆ ಅದರಲ್ಲಿ ಈ ರೀತಿಯ ಹೆಚ್ಚಿನ ಸೌಕರ್ಯ ನೀಡಲು ಸಾಧ್ಯ. ಅಡ್ಡ ನೀಟ ಸುಳುಹುಗಳಲ್ಲದೆ, ಪ್ರತಿಯೊಂದು ಚೌಕಕ್ಕೂ ಪ್ರತ್ಯೇಕ ಸುಳುಹು ಅಥವಾ ಉತ್ತರ ನೀಡಬಹುದು. ಇಂಗ್ಲಿಶ್ ಭಾಷೆಯಲ್ಲಿ ಇಂತಹ ಪದಬಂಧಗಳನ್ನು ನೀಡುವ ಜಾಲತಾಣಗಳು ಬೇಕಾದಷ್ಟಿವೆ. ಕನ್ನಡದಲ್ಲಿ? ಹೌದು. ಈಗ ಕನ್ನಡ ಭಾಷೆಯಲ್ಲೂ ಅಂತರಜಾಲ ಮೂಲಕ ಪದಬಂಧ ಬಿಡಿಸಬಹುದು. ಅದಕ್ಕಾಗಿ ನೀವು www.indicross.com ಜಾಲತಾಣಕ್ಕೆ ಭೇಟಿ ನೀಡಬೇಕು.